انجليزى !!!!!!!! ليه ؟ عشان ايه؟ ازاى ؟

اكيد انتو عارفين ان الانجليزى مهم جدا لاى مهاجر طيب ليه ؟

- عشان لما اسافر في اى مكان والاقى كل الناس بتتكلم انجليزى ماحسش ان انا قليل واعرف اتعامل معاهم وافهمهم مبقاش زى التايه

- عشان لما أوصل هناك أكون جاهز مش لسة هتعلم من اول وجديد عايز اقو لكم ان اللى بيسافر من غير لغة بيتبهدل او سنة او اول سنتين

- عشان المنح الكتير اللى بتنزل من مختلف الدول بتشترط ان اللى يسافر في المنحة يكون فصيح في الانجليزى ده اذا كانت مش بتطلب مستوى أدى في امتحان التويفل او التويك

- عشان اى شغلانة لو مكانتش عاوزانى بتكلم انجليزى على الأقل ممتاز هتبقى شغلانة تعبانة وملهاش مستقبل زى بياع هوت دوج على الرصيف مثلا

- عشان اللى بيشتغل بالالنجليزى بياخد مرتب اكبر من اللى مش معاه لغة اول ما بيوصل الى البلد الجديد

- عشان الانجليزى هيزود ثقتى في نفسى قوى ويخلينى اروح اى حتة وادخل اى مكان

- عشان لو كسرت حاجز الانجليزى هبقى كسرت حاجز اى لغة واقدر بعد كده اخش في اى لغة اتعلمها وانا مش خايف

طيب لو ان مش بحب الانجليزى اعمل ايه؟

طيب في ناس ممكن تكون بتحب الانجليزى  فده هيبقى سهل قوى عليها وفيناس تانية ممكن تكون بتكره الانجليزى او على الأقل مش بتحبه

الرد على الكلام ده ....... هو في حد بيكره العربى ؟ يعنى وانت بيعلموك الكلام وانت صغير حلو كده ؟ حسيت انك بتكره العربى فمش هتعرف تتعلمه؟

 مشكلة اللغة  اننا خدنها مادة في المدرسة ...زى الجغرافيا ...... والمواد في منها اللى بنحبها وفى اللى مش بنحبها .... بناء بقى على المدرس اللى بيدينا او على ميولنا احنا و على حاجات كتير

لكن اللغة مش مادة ... اللغة مش ورقة وقلم تمسكهم وتحفظ قواعد زى الرياضة .... وامتحان اخر السنة تكتب معلومتين حافظهم في دماغك بالعافية وبعدين تنساهم

حاجات مهمة قى لازم تبقى جواك قبل ما تبدأ

أولا انت مش بتتعلم انجليزى عشان تتنطط على خلق الله  مش ده الهدف  حاول تتخلص من العقد اللى جواك  انت بتتعلم عشان تعرف تطلع انت بره وتساعد اللى بعدك

ثانيا لو انت مش متوكل على ربنا ومش عارف ومش ومتأكد انه مش هيضيع تعبك  مش هتوصل لحاجة ..لو مش مؤمن انك في يوم من الأيام هتحقق هدفك وتسافر  وان اخرتها برضة مشش هتتكلم انجليزى يبقى مش هتتكلم  انما لو بدأت وانت بتقول يا رب انا بعمل اللى عليا وانا عارف انك هتساعدنى عشان انا هتعب ..هتلاقى نفسك بتتحسن لان ربنا عند ظنك بيه

ثالثا في ناس اتعلمت انجليزى غيرك كتير .... ومصر اكتر البلاد اللى سهل فيها تتعلم انجليزى لان الناس كلها حواليك بتتعلم انجليزى  ... وعندك تلفزيون فيه انجليزى  وراديو فيه انجليزى والشارع فيه انجليزى والبيت فيه انجليزى ...والمواضيع اللى في قسم اللغة  مش مجرد كلام  ده تجارب ناس جربت ووصلت ... فلازم تبقى عارف ان التعب ربنا بيطلع قصاده نتيجة

تصنيف : اللغات