القصة من البداية

القصة من البداية 

مرة كنت قاعد فى ندوة عن التنمية البشرية وبعدين االمحاضر قال ( يا جماعة عشان تحقق هدفك  لازم اول حاجة تعملها انك تكتب هدفك ده فى ورقة وتخليها امامك طول الوقت عشان تفتكرها ولو فى انشغلت ونسيت الهدف الورقة دى هتفكرك. تعرفوا بقى انكم بكده حققتوا 50% من وصولكوا للهدف)
واحد قاعد جنبى قال (انا عامل لوحة كبيرة فوق السريركل ما اصحا الصبح اشوفها وافتكرها )
وواحد قال( انا كاتبها على ورقة على الحيطة اللى فى وشى لما اقعد على الكمبيوتر)
وواحد تانى قال ( انا كاتبها على نوتة الموبيل  كل ما افتح الموبيل اشوفها امامى طول الوقت )
المهم انا قعدت افكر هو انا عايز ايه اصلا ........ هو انا عايز عربية ؟   مممممممممممممممم ممكن ! هوانا عايز شقة ؟ طبعا .....هو انا محتاج اتجوز ؟ اه ه ه ه ه    .....طيب هو انا عشان احقق حاجات زى دى وابقى بني ادم محتاج اد اية وقت ؟ سنة  .5 سنين...... 10 سنين
وبعدين افتكرت اساسا قد ايه بتبهدل كل يوم فى الموصلات لحد الشغل والزحمة والوقت الطووووووووووويل جدا
وافتكرت الاكل اللى احنا بناكله ونسمع عنه كل يوم بلاوى ومسرطن وحاجة تتعب  وافتكرت  البيوت اللى احنا فيه والزحمة حتى جوا البيت ولما كل ايوم ارجع من الشغل وملاقيش اى مياه من الحنفية و النور اللى بيقطع كل يوم
وطبعا مش عايز اتكلم فى السياسة بقى سبونى فى اللى انا فيه !!!!!!!
طيب هو انا عايز اسافر واحقق هدفى واشتغل فى المجال اللى انا بحبه وانجح فيه؟ (انا عرفت هدفى  انا عايز اعيش عيشة كريمة انا عايز اهاجر )
وانطلاقا من مبدأ (اكتب هدفك فى ورقة ) انا قررت انى اعمل المدونة واكتب فيها هدفى عشان افتكر كل يوم ايه هو هدفى وعشان كمان اشارك التجربة دى مع اشخاص حابين يخوضوا نفس التجربة
نسيت اقول لكم المحاضر قال كمان (لازم يكون الهدف محدد بوقت معين لكى لا يصبح مجرد امنية وايضا خطة  زمنية ) هقول على الوقت المحدد انه بالضبط بالضبط بعد سنتين من اليوم الى هو بتاريخ اول يناير 2013 هكون خارج مصر أن شاء الله وعشان كده هضع فى المدونة عد تنازلى حتى انتهاء السنتين وهيبقى مش مجرد هدف هيبقى تحدى
الهدف التانى والمنبثق من الاول انى لازم اتعلم انجليزى جامد جدا فى خلال سنة واحدة وأخد على الاقل تويفل ( اومال انت فاكر هتسافر بلغتك دى وتطلع تتسوح ) عشان كده هعملت قسم اللغات وان شاء الله هنحط تجارب ناس فى تعلم اللغة واماكن الدورات والكتب وحاجات تانى كتير
وكمان قسم تنمية بشرية عشان هنحتجها خلال السنتين دول جامد قوى وقسم المنح بيهتم بأخر المنح للطلبة او المتخرجين حتى اللى معاهم دبلومة (طبعا منح خارج مصر ) او داخلها مايضرش  وقسم الاحداث اللى بنعرف منه ايه الاحداث اللى ممكن تساهم خطوة فى طريق الهجرة
اخيرا بالنسبة للناس اللى هتقولى ان مصر لسه فيها امل !!!!!! احب اقولك good luck

تصنيف : الاحداث